ಎರಡು ದಶಕಗಳ ಬಳಿಕ UCB ಪರವಾನಗಿ ಪ್ರಕ್ರಿಯೆಗೆ ಮರುಚಾಲನೆ; ಬಲಿಷ್ಠ ಸಹಕಾರಿ ಸಂಸ್ಥೆಗಳಿಗೆ ಬ್ಯಾಂಕಿಂಗ್ ಕ್ಷೇತ್ರ ಪ್ರವೇಶದ ಅವಕಾಶ
ಮುಂಬೈ: ಅರ್ಬನ್ ಕೋ ಆಪರೇಟಿವ್ ಬ್ಯಾಂಕ್ಗಳ (UCB) ಹೊಸ ಪರವಾನಗಿ ನೀಡುವ ಪ್ರಕ್ರಿಯೆಯನ್ನು ಸುಮಾರು ಎರಡು ದಶಕಗಳ ಬಳಿಕ ಪುನರಾರಂಭಿಸಲು ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಮುಂದಾಗಿದೆ. ಹೊಸ ‘ಆನ್-ಟ್ಯಾಪ್’ ಪರವಾನಗಿ ವ್ಯವಸ್ಥೆಯಡಿ UCB ಆಗಿ ಪರಿವರ್ತನೆಗೊಳ್ಳಲು ಬಯಸುವ ಅರ್ಹ ಕ್ರೆಡಿಟ್ ಸಹಕಾರಿ ಸಂಸ್ಥೆಗಳಿಗೆ ಬಂಡವಾಳ, ಠೇವಣಿ, ಆಡಳಿತ ಹಾಗೂ ಹಣಕಾಸು ಸಾಮರ್ಥ್ಯಕ್ಕೆ ಸಂಬಂಧಿಸಿದ ಕಟ್ಟುನಿಟ್ಟಿನ ಮಾನದಂಡಗಳನ್ನು ನಿಗದಿಪಡಿಸಲಾಗಿದೆ.
https://chat.whatsapp.com/FCEnlTkAKCC0MGPhXtX4i4
ಆರ್ಬಿಐ ಪ್ರಸ್ತಾಪಿಸಿರುವ ಮಾನದಂಡಗಳ ಪ್ರಕಾರ, ಪಟ್ಟಣ ಸಹಕಾರಿ ಬ್ಯಾಂಕ್ಗಳ ಪರವಾನಗಿಗಾಗಿ ಅರ್ಜಿ ಸಲ್ಲಿಸುವ ಸಂಸ್ಥೆಯು ಕನಿಷ್ಠ ₹300 ಕೋಟಿ ಬಂಡವಾಳ/ನೆಟ್ವರ್ತ್ ಹೊಂದಿರಬೇಕು. ಜತೆಗೆ ಸಂಸ್ಥೆಯು ₹10,000 ಕೋಟಿ ಠೇವಣಿ ಆಧಾರ ಹೊಂದುವ ಸಾಮರ್ಥ್ಯವನ್ನು ಹೊಂದಿರಬೇಕೆಂಬ ಪ್ರಮುಖ ಷರತ್ತನ್ನೂ ಮುಂದಿಡಲಾಗಿದೆ.
ಹೊಸ ಅರ್ಬನ್ ಕೋ ಆಪರೇಟಿವ್ ಬ್ಯಾಂಕ್ಗಳಿಗೆ ಪರವಾನಗಿ ನೀಡುವ ಪ್ರಕ್ರಿಯೆಯನ್ನು ಆರ್ಬಿಐ 2004ರಿಂದ ಸ್ಥಗಿತಗೊಳಿಸಿತ್ತು. ಇದೀಗ ಸಹಕಾರಿ ಬ್ಯಾಂಕಿಂಗ್ ಕ್ಷೇತ್ರದ ಬೆಳವಣಿಗೆ ಮತ್ತು ಹಣಕಾಸು ಸ್ಥಿರತೆಯನ್ನು ಗಮನದಲ್ಲಿಟ್ಟುಕೊಂಡು ಪರವಾನಗಿ ವ್ಯವಸ್ಥೆಯನ್ನು ಮರುಪರಿಶೀಲಿಸಲಾಗಿದೆ. 2026ರ ಜನವರಿಯಲ್ಲಿ ಆರ್ಬಿಐ ಹೊಸ ಅರ್ಬನ್ ಕೋ ಆಪರೇಟಿವ್ ಬ್ಯಾಂಕ್ಗಳ ಪರವಾನಗಿ ವ್ಯವಸ್ಥೆಯನ್ನು ಮರುಪ್ರಾರಂಭಿಸುವ ಕುರಿತು ಚರ್ಚಾ ಪತ್ರ ಪ್ರಕಟಿಸಿ, ಸಹಕಾರಿ ಕ್ಷೇತ್ರ ಸೇರಿದಂತೆ ವಿವಿಧ ಹಿತಾಸಕ್ತಿದಾರರಿಂದ ಅಭಿಪ್ರಾಯಗಳನ್ನು ಆಹ್ವಾನಿಸಿತ್ತು. ಸ್ವೀಕರಿಸಿದ ಸಲಹೆಗಳನ್ನು ಪರಿಶೀಲಿಸಿದ ಬಳಿಕ ಪಟ್ಟಣ ಸಹಕಾರಿ ಬ್ಯಾಂಕ್ಗಳಿಗೆ ‘ಆನ್-ಟ್ಯಾಪ್’ ಪರವಾನಗಿ ವ್ಯವಸ್ಥೆ ಜಾರಿಗೆ ತರಲು RBI ಮುಂದಾಗಿದೆ.
‘ಆನ್-ಟ್ಯಾಪ್’ ವ್ಯವಸ್ಥೆಯಡಿ, ನಿಗದಿತ ಅವಧಿಯ ಪರವಾನಗಿ ವಿಂಡೋವನ್ನು ಕಾಯುವ ಅಗತ್ಯವಿಲ್ಲ. ಅರ್ಹತಾ ಮಾನದಂಡಗಳನ್ನು ಪೂರೈಸುವ ಸಂಸ್ಥೆಗಳು ನಿರ್ದಿಷ್ಟ ನಿಯಮಗಳ ಅನುಸಾರ ಪರವಾನಗಿಗಾಗಿ ಅರ್ಜಿ ಸಲ್ಲಿಸಲು ಅವಕಾಶ ಪಡೆಯಲಿವೆ.
ಸಣ್ಣ ಸಹಕಾರಿ ಸಂಸ್ಥೆಗಳಿಗೆ ಸವಾಲು?
₹300 ಕೋಟಿ ಬಂಡವಾಳ ಮತ್ತು ₹10,000 ಕೋಟಿ ಠೇವಣಿ ಮಾನದಂಡವು ಸಣ್ಣ ಹಾಗೂ ಮಧ್ಯಮ ಗಾತ್ರದ ಸಹಕಾರಿ ಕ್ರೆಡಿಟ್ ಸಂಸ್ಥೆಗಳಿಗೆ ದೊಡ್ಡ ಸವಾಲಾಗುವ ಸಾಧ್ಯತೆಯಿದೆ. ದೊಡ್ಡ ಸದಸ್ಯತ್ವ, ಉತ್ತಮ ಠೇವಣಿ ಆಧಾರ, ಸಮರ್ಪಕ ಬಂಡವಾಳ ಮತ್ತು ಬಲಿಷ್ಠ ಹಣಕಾಸು ನಿರ್ವಹಣೆ ಹೊಂದಿರುವ ಸಹಕಾರಿ ಸಂಸ್ಥೆಗಳೇ ಹೊಸ ವ್ಯವಸ್ಥೆಯಡಿ ಯುಸಿಬಿ ಪರವಾನಗಿಗೆ ಅರ್ಹತೆ ಪಡೆಯುವ ಸಾಧ್ಯತೆ ಹೆಚ್ಚಾಗಿದೆ. ಆರ್ಬಿಐನ ಈ ಕ್ರಮದ ಉದ್ದೇಶ ಕೇವಲ ಹೊಸ ಪಟ್ಟಣ ಸಹಕಾರಿ ಬ್ಯಾಂಕ್ಗಳ ಸಂಖ್ಯೆಯನ್ನು ಹೆಚ್ಚಿಸುವುದಲ್ಲ, ಬದಲಾಗಿ ಸಾಕಷ್ಟು ಬಂಡವಾಳ, ಉತ್ತಮ ಆಡಳಿತ, ಹಣಕಾಸು ಸ್ಥಿರತೆ ಹಾಗೂ ಸಮರ್ಥ ನಿರ್ವಹಣೆಯನ್ನು ಹೊಂದಿರುವ ಬಲಿಷ್ಠ ಸಹಕಾರಿ ಬ್ಯಾಂಕಿಂಗ್ ಸಂಸ್ಥೆಗಳನ್ನು ರೂಪಿಸುವುದು ಇದರ ಪ್ರಮುಖ ಉದ್ದೇಶವಾಗಿದೆ.
ಸಹಕಾರ ಕ್ಷೇತ್ರಕ್ಕೆ ಮಹತ್ವದ ಬೆಳವಣಿಗೆ
ಪಟ್ಟಣ ಸಹಕಾರಿ ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ಹೊಸ ಪರವಾನಗಿಗಳಿಗೆ ಅವಕಾಶ ಕಲ್ಪಿಸಿರುವುದು ಸಹಕಾರ ಕ್ಷೇತ್ರದ ಪಾಲಿಗೆ ಮಹತ್ವದ ಬೆಳವಣಿಗೆಯಾಗಿದೆ. ಆದರೆ ಹೆಚ್ಚಿನ ಬಂಡವಾಳ ಮತ್ತು ಠೇವಣಿ ಮಾನದಂಡಗಳಿಂದಾಗಿ ಸಣ್ಣ ಹಾಗೂ ಮಧ್ಯಮ ಸಹಕಾರಿ ಸಂಸ್ಥೆಗಳ ಬ್ಯಾಂಕಿಂಗ್ ಕ್ಷೇತ್ರ ಪ್ರವೇಶದ ಅವಕಾಶ ಸೀಮಿತವಾಗುವ ಸಾಧ್ಯತೆಯೂ ಇದೆ. ಹೀಗಾಗಿ, ಹೊಸ ಅರ್ಬನ್ ಕೋ ಆಪರೇಟಿವ್ ಬ್ಯಾಂಕ್ಗಳ ಪರವಾನಗಿ ವ್ಯವಸ್ಥೆಯು ಹಣಕಾಸು ಸ್ಥಿರತೆ ಮತ್ತು ಉತ್ತಮ ಆಡಳಿತಕ್ಕೆ ಬಲ ನೀಡುವ ಕ್ರಮವೇ ಅಥವಾ ಸಣ್ಣ ಸಹಕಾರಿ ಸಂಸ್ಥೆಗಳಿಗೆ ಕಠಿಣ ಪ್ರವೇಶ ಮಾನದಂಡವೇ? ಎಂಬ ಚರ್ಚೆ ಸಹಕಾರ ಕ್ಷೇತ್ರದಲ್ಲಿ ನಡೆಯುವ ಸಾಧ್ಯತೆಯಿದೆ. ಆರ್ಬಿಐನ ಅಂತಿಮ ಮಾರ್ಗಸೂಚಿಗಳು ಪ್ರಕಟವಾದ ಬಳಿಕ ಪರವಾನಗಿಗೆ ಸಂಬಂಧಿಸಿದ ಅರ್ಹತೆ, ಪ್ರವರ್ತಕರ ಮಾನದಂಡ, ಆಡಳಿತ ವ್ಯವಸ್ಥೆ, ಬಂಡವಾಳದ ಅವಶ್ಯಕತೆ ಸೇರಿದಂತೆ ಇತರ ಷರತ್ತುಗಳ ಕುರಿತು ಹೆಚ್ಚಿನ ಸ್ಪಷ್ಟತೆ ದೊರೆಯಲಿದೆ.
