ಬೆಂಗಳೂರು: ಅರ್ಬನ್ ಕೋ-ಆಪರೇಟಿವ್ ಬ್ಯಾಂಕ್ಗಳ (UCB) ನಿರ್ದೇಶಕರ ಅಧಿಕಾರಾವಧಿಗೆ ಸಂಬಂಧಿಸಿದಂತೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ಹೊರಡಿಸಿರುವ ನೂತನ ನಿಯಮಾವಳಿಗಳನ್ನು ಪ್ರಶ್ನಿಸಿ ಸಲ್ಲಿಕೆಯಾಗಿರುವ ಅರ್ಜಿಗಳ ವಿಚಾರಣೆಯನ್ನು ಕರ್ನಾಟಕ ಹೈಕೋರ್ಟ್ನಲ್ಲಿ ಇಂದು (ಜುಲೈ 31, 2026) ನಿಗದಿಪಡಿಸಲಾಗಿದೆ.
https://chat.whatsapp.com/FCEnlTkAKCC0MGPhXtX4i4
ಪಟ್ಟಣ ಸಹಕಾರ ಬ್ಯಾಂಕ್ಗಳ ನಿರ್ದೇಶಕರು ಸತತ 10 ವರ್ಷಗಳ ಅಧಿಕಾರಾವಧಿ ಪೂರ್ಣಗೊಳಿಸಿದ ನಂತರ ಕಡ್ಡಾಯವಾಗಿ 3 ವರ್ಷಗಳ ‘ಕೂಲಿಂಗ್ ಆಫ್’ (Cooling-off) ಅವಧಿಯನ್ನು ಹೊಂದಿರಬೇಕು ಎಂಬ ಆರ್ಬಿಐನ ಮಾರ್ಗದರ್ಶಿ ಸೂತ್ರಗಳನ್ನು ಪ್ರಶ್ನಿಸಿ ಬೆಂಗಳೂರಿನ ನ್ಯಾಯಮಿತ್ರ ಸಹಕಾರಿ ಬ್ಯಾಂಕ್ ನಿಯಮಿತ ಮತ್ತು ಕರ್ನಾಟಕ ರಾಜ್ಯ ಸಹಕಾರ ಪಟ್ಟಣ ಬ್ಯಾಂಕುಗಳ ಮಹಾಮಂಡಳ ಹೈಕೋರ್ಟ್ ಮೆಟ್ಟಿಲೇರಿದ್ದವು. ಈ ಹಿಂದೆ ಅರ್ಜಿಗಳ ವಿಚಾರಣೆ ನಡೆಸಿದ್ದ ನ್ಯಾಯಮೂರ್ತಿ ಸೂರಜ್ ಗೋವಿಂದರಾಜ್ ಅವರಿದ್ದ ಹೈಕೋರ್ಟ್ ಪೀಠವು, ಆರ್ಬಿಐ ನಿಯಮಾವಳಿಗಳ ಅಡಿಯಲ್ಲಿ ಅರ್ಜಿದಾರ ಬ್ಯಾಂಕ್ಗಳು ಹಾಗೂ ನಿರ್ದೇಶಕರ ವಿರುದ್ಧ ಯಾವುದೇ ಬಲವಂತದ/ಶಿಸ್ತಿನ ಕ್ರಮ (Coercive action) ಕೈಗೊಳ್ಳದಂತೆ ನೀಡಿದ್ದ ಮಧ್ಯಂತರ ತಡೆಯಾಜ್ಞೆ/ರಕ್ಷಣೆಯನ್ನು ಜುಲೈ 31ರವರೆಗೆ ವಿಸ್ತರಿಸಿತ್ತು. ಅರ್ಜಿದಾರರ ವಾದಗಳು ಸಹಕಾರ ಸಂಘಗಳು ಮತ್ತು ಬ್ಯಾಂಕ್ಗಳ ನಿಯಂತ್ರಣವು ಸಂವಿಧಾನದ ರಾಜ್ಯ ಪಟ್ಟಿಯ (State List – Entry 32) ವ್ಯಾಪ್ತಿಗೆ ಬರುತ್ತವೆ. ಕರ್ನಾಟಕ ಸಹಕಾರ ಸಂಘಗಳ ಕಾಯ್ದೆಯಡಿ ಕಾರ್ಯನಿರ್ವಹಿಸುವ ಬ್ಯಾಂಕ್ಗಳ ಮೇಲೆ ಆರ್ಬಿಐ ಇಂತಹ ಏಕಪಕ್ಷೀಯ ಅಧಿಕಾರಾವಧಿ ಮಿತಿಯನ್ನು ಹೇರುವುದು ಸಂವಿಧಾನಬಾಹಿರ ಎಂಬುದು ಮಹಾಮಂಡಳದ ವಾದವಾಗಿದೆ. ಇಂದಿನ ವಿಚಾರಣೆಯಲ್ಲಿ ಕೋರ್ಟ್ ನೀಡಲಿರುವ ತೀರ್ಪು ಅಥವಾ ನೀಡುವ ಮುಂದಿನ ಆದೇಶವು ರಾಜ್ಯದ ನೂರಾರು ಅರ್ಬನ್ ಕೋ-ಆಪರೇಟಿವ್ ಬ್ಯಾಂಕ್ಗಳ ಆಡಳಿತ ಮಂಡಳಿಗಳು ಹಾಗೂ ನಿರ್ದೇಶಕರಿಗೆ ಅತ್ಯಂತ ನಿರ್ಣಾಯಕವಾಗಲಿದೆ.
ಆರ್ಬಿಐ 2026ರ ಮೇ 25ರಂದು ಹೊರಡಿಸಿದ ತಿದ್ದುಪಡಿ ನಿರ್ದೇಶನದ ಪ್ರಕಾರ, ಯುಸಿಬಿಯ ನಿರ್ದೇಶಕರು ಒಂದೇ ಬ್ಯಾಂಕ್ನ ಆಡಳಿತ ಮಂಡಳಿಯಲ್ಲಿ ನಿರಂತರವಾಗಿ 10 ವರ್ಷ ಪೂರ್ಣಗೊಳಿಸಿದ ಬಳಿಕ, ಅದೇ ಬ್ಯಾಂಕ್ನ ಮಂಡಳಿಗೆ ಮರುನೇಮಕವಾಗಲು ಕನಿಷ್ಠ 3 ವರ್ಷಗಳ ಕೂಲಿಂಗ್ ಆಫ್ ಅವಧಿ ಪೂರ್ಣಗೊಳಿಸಬೇಕು. ಈ ಅವಧಿಯಲ್ಲಿ ಅವರು ಸದಸ್ಯರು ಅಥವಾ ಗ್ರಾಹಕರಾಗಿ ಇರುವುದನ್ನು ಹೊರತುಪಡಿಸಿ ಬ್ಯಾಂಕ್ನೊಂದಿಗೆ ಯಾವುದೇ ರೀತಿಯಲ್ಲಿ ಸಂಬಂಧ ಹೊಂದಲು ಸಾಧ್ಯವಿಲ್ಲ. ಇದಲ್ಲದೆ, ಮೂರು ವರ್ಷಕ್ಕಿಂತ ಕಡಿಮೆ ಅವಧಿಯ ವಿರಾಮವನ್ನು ನೀಡಿಕೊಂಡು ಮತ್ತೆ ನಿರ್ದೇಶಕರಾಗುವ ಮೂಲಕ 10 ವರ್ಷದ ಮಿತಿಯನ್ನು ತಪ್ಪಿಸುವ ಪ್ರಯತ್ನವನ್ನೂ ನಿರಂತರ ಸೇವೆಯ ಲೆಕ್ಕಾಚಾರದಲ್ಲಿ ಪರಿಗಣಿಸುವಂತೆ ಆರ್ಬಿಐ ಸ್ಪಷ್ಟಪಡಿಸಿದೆ.
