ರಾಷ್ಟ್ರೀಯ ಸಹಕಾರ ದತ್ತಸಂಚಯದ ಮಾಹಿತಿ ಆಧರಿಸಿ ಸಹಕಾರ ಸಚಿವ ಅಮಿತ್ ಷಾ ಲೋಕಸಭೆಯಲ್ಲಿ ಮಾಹಿತಿ
ನವದೆಹಲಿ: ದೇಶಾದ್ಯಂತ ಪ್ರಸ್ತುತ 6.56 ಲಕ್ಷಕ್ಕೂ ಹೆಚ್ಚು ಸಹಕಾರಿ ಸಂಘಗಳು ಸಕ್ರಿಯವಾಗಿ ಕಾರ್ಯನಿರ್ವಹಿಸುತ್ತಿದ್ದು, 1.39 ಲಕ್ಷ ಸಹಕಾರ ಸಂಘಗಳು ನಿಷ್ಕ್ರಿಯವಾಗಿವೆ ಮತ್ತು 48,537 ಸಂಘಗಳು ದಿವಾಳಿ ಹಂತದಲ್ಲಿವೆ ಎಂದು ಕೇಂದ್ರ ಸಹಕಾರ ಸಚಿವ ಅಮಿತ್ ಷಾ ಮಂಗಳವಾರ ಲೋಕಸಭೆಗೆ ಮಾಹಿತಿ ನೀಡಿದ್ದಾರೆ.
https://chat.whatsapp.com/FCEnlTkAKCC0MGPhXtX4i4
ರಾಷ್ಟ್ರೀಯ ಸಹಕಾರಿ ದತ್ತಸಂಚಯ (ಎನ್ಸಿಡಿ) ಪೋರ್ಟಲ್ನಲ್ಲಿ ನವೆಂಬರ್ 15ರ ತನಕದ ಲಭ್ಯವಿರುವ ಮಾಹಿತಿ ಆಧರಿಸಿ ಹೇಳಿಕೆ ನೀಡಿರುವ ಅಮಿತ್ ಷಾ, ರಾಜ್ಯವಾರು ವಿವರಗಳನ್ನು ಒದಗಿಸಿದ್ದು, ಮಹಾರಾಷ್ಟ್ರವು ಸುಮಾರು 2.17 ಲಕ್ಷ ಕ್ರಿಯಾತ್ಮಕ ಸಹಕಾರಿ ಸಂಘಗಳೊಂದಿಗೆ ದೇಶದಲ್ಲೇ ಮುಂಚೂಣಿಯಲ್ಲಿದೆ. ಗುಜರಾತ್ (78,215), ತೆಲಂಗಾಣ (48,186), ಕರ್ನಾಟಕ (40,231) ಮತ್ತು ಮಧ್ಯಪ್ರದೇಶ (27,370) ನಂತರದ ಸ್ಥಾನದಲ್ಲಿವೆ. ರಾಜಸ್ಥಾನದಲ್ಲಿ 25,491 ಕ್ರಿಯಾತ್ಮಕ ಸಹಕಾರ ಸಂಘಗಳಿದ್ದರೆ, ಪಶ್ಚಿಮ ಬಂಗಾಳ (22,952) ಮತ್ತು ಉತ್ತರ ಪ್ರದೇಶ (22,724) ಸಹ ಗಮನಾರ್ಹ ಸಂಖ್ಯೆಯ ಸಕ್ರಿಯ ಸಂಘಗಳನ್ನು ಹೊಂದಿವೆ ಎಂದು ಲಿಖಿತ ಮಾಹಿತಿ ನೀಡಿದರು.
ನಿಷ್ಕ್ರಿಯ ಸಹಕಾರ ಸಂಘಗಳ ವಿಷಯದಲ್ಲಿ ಮಧ್ಯಪ್ರದೇಶ (18,423), ಉತ್ತರ ಪ್ರದೇಶ (17,180), ರಾಜಸ್ಥಾನ (13,419) ಮತ್ತು ತೆಲಂಗಾಣ (12,297) ಪ್ರಮುಖವಾಗಿವೆ. ಹರಿಯಾಣ ಮತ್ತು ಮಧ್ಯಪ್ರದೇಶಗಳಲ್ಲಿ ಕ್ರಮವಾಗಿ 16,378 ಮತ್ತು 8,852 ಸಂಘಗಳು ದಿವಾಳಿಯಾಗಿದ್ದು ದಿವಾಳಿಯಾಗಿರುವ ಸಹಕಾರ ಸಂಘಗಳ ಪೈಕಿ ಮೊದಲೆರಡು ಸ್ಥಾನಗಳಲ್ಲಿವೆ ಎಂದು ಹೇಳಿದರು. ಲಕ್ಷದ್ವೀಪ, ಲಡಾಖ್, ಪುದುಚೇರಿ, ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು, ದಾದ್ರಾ ಮತ್ತು ನಗರ ಹವೇಲಿ ಮತ್ತು ದಮನ್ ಮತ್ತು ದಿಯುಗಳಂತಹ ಸಣ್ಣ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳು ಕಡಿಮೆ ಸಹಕಾರ ಸಂಘಗಳನ್ನು ಹೊಂದಿದ್ದರೂ ಇಲ್ಲಿ ನಿಷ್ಕ್ರಿಯ ಅಥವಾ ದಿವಾಳಿ ಸಂಘಗಳೇ ಹೆಚ್ಚಾಗಿವೆ.
ಆಗಸ್ಟ್ 2023ರಲ್ಲಿ ಅಧಿಸೂಚನೆ ಹೊರಡಿಸಲಾದ ಬಹು-ರಾಜ್ಯ ಸಹಕಾರಿ ಸಂಘಗಳು (MSCS) (ತಿದ್ದುಪಡಿ) ಕಾಯ್ದೆ ಮತ್ತು ನಿಯಮಗಳು, 2023 ಅನ್ನು ತೊಂಬತ್ತೇಳನೇ ಸಾಂವಿಧಾನಿಕ ತಿದ್ದುಪಡಿಗೆ ಅನುಗುಣವಾಗಿ ಆಡಳಿತವನ್ನು ಬಲಪಡಿಸಲು, ಪಾರದರ್ಶಕತೆ ಮತ್ತು ಹೊಣೆಗಾರಿಕೆ ಹೆಚ್ಚಿಸಲು ಮತ್ತು ಬಹು-ರಾಜ್ಯ ಸಹಕಾರಿ ಸಂಘಗಳಲ್ಲಿ ಚುನಾವಣಾ ಪ್ರಕ್ರಿಯೆ ಸುಧಾರಿಸಲು ಜಾರಿಗೆ ತರಲಾಗಿದೆ ಎಂದು ಸಚಿವ ಅಮಿತ್ ಷಾ ಹೇಳಿದ್ದು, ಸಹಕಾರಿ ಚುನಾವಣಾ ಪ್ರಾಧಿಕಾರದ ಸ್ಥಾಪನೆ, ಸಹಕಾರಿ ಒಂಬುಡ್ಸ್ಮನ್ ನೇಮಕ, ಮಾಹಿತಿ ಅಧಿಕಾರಿಗಳ ಮೂಲಕ ಕಡ್ಡಾಯ ಬಹಿರಂಗಪಡಿಸುವಿಕೆ, ಕಠಿಣ ಲೆಕ್ಕಪರಿಶೋಧನೆ ಮತ್ತು ಲೆಕ್ಕಪತ್ರ ಮಾನದಂಡಗಳು, ಕ್ರೆಡಿಟ್ ಸೊಸೈಟಿಗಳಿಗೆ ವಿವೇಕಯುತ ಮಾನದಂಡಗಳು, ಸ್ವಜನಪಕ್ಷಪಾತದ ವಿರುದ್ಧ ರಕ್ಷಣೆ, ನಿರ್ದೇಶಕರ ಅನರ್ಹತೆಗೆ ಹೆಚ್ಚುವರಿ ಆಧಾರಗಳು ಮತ್ತು ನಿಗದಿತ ಕೋರಂ ಮಾನದಂಡಗಳ ಮೂಲಕ ಪ್ರಜಾಪ್ರಭುತ್ವ ಕಾರ್ಯನಿರ್ವಹಣೆಯನ್ನು ಹೆಚ್ಚಿಸುವುದು ಪ್ರಮುಖ ಸುಧಾರಣೆಗಳಲ್ಲಿ ಸೇರಿವೆ ಎಂಬುದಾಗಿ ವಿವರಿಸಿದ್ದಾರೆ.
ಮಾರ್ಚ್ 8, 2024ರಂದು ಪ್ರಾರಂಭಿಸಲಾದ ರಾಷ್ಟ್ರೀಯ ಸಹಕಾರಿ ಡೇಟಾಬೇಸ್, ದೇಶಾದ್ಯಂತ 8.4 ಲಕ್ಷಕ್ಕೂ ಹೆಚ್ಚು ಸಹಕಾರಿ ಸಂಸ್ಥೆಗಳ ಮಾಹಿತಿಗೆ ಏಕ-ಬಿಂದು ಪ್ರವೇಶವನ್ನು ಒದಗಿಸುತ್ತದೆ ಮತ್ತು ಸಹಕಾರಿ ವ್ಯಾಪ್ತಿಯಲ್ಲಿನ ಅಂತರವನ್ನು ಗುರುತಿಸಲು ಇದನ್ನು ಬಳಸಲಾಗುತ್ತಿದೆ ಎಂದು ಸಚಿವರು ಹೇಳಿದರು.
ನಿಮ್ಮ ಸಂಸ್ಥೆಗಳ ಸುದ್ದಿ ಪ್ರಕಟಣೆ ಮತ್ತು ಜಾಹೀರಾತಿಗಾಗಿ ಸಂಪರ್ಕಿಸಿ: 9901319694